ព័ត៌មាន: ផ្សិត និងប្រទាល ជាវត្ថុធាតុដើមក្នុងការផលិតកៅអីរបស់រថយន្តអគ្គិសនី Mercedes ថ្មី

ក្រុមហ៊ុន Mercedes-Benz បានដាក់បង្ហាញរថយន្តអគ្គិសនីដ៏ទំនើបមួយ ដែលអាចនាំអ្នកបើកបរពីទីក្រុងញូវយ៉ក ទៅកាន់ទីក្រុង Detroit ដោយចំណាយអស់ត្រឹមតែម្តងប៉ុណ្ណោះ។

ក្រុមហ៊ុនផលិតរថយន្តអាឡឺម៉ង់មួយនេះបានដាក់ឈ្មោះរថយន្តនេះថា VISION EQXX ដែលត្រូវបានរចនាឡើងដើម្បីធ្វើដំណើរបានចម្ងាយប្រមាណ 1,000 គីឡូម៉ែត្រ ឬប្រហែល 620 ម៉ាយ​ដោយតម្រូវការសាកថ្មតែម្ដងប៉ុណ្ណោះ បើយោងទៅតាមការសាកល្បងតាមបច្ចេកវិទ្យាកុំព្យូទ័រ។ ដោយឡែករថយន្តអគ្គិសនី Nissan Leaf ដំបូងអាចធ្វើដំណើរបានចម្ងាយត្រឹមតែ 74 ម៉ាយប៉ុណ្ណោះលើការសាកមួយលើក ខណៈពេលដែលរថយន្តអគ្គិសនីទំនើបៗជាច្រើនអាចធ្វើដំណើរបានចម្ងាយដល់ 300 ម៉ាយ ឬច្រើនជាងនេះដោយការសាកតែមួយលើក។

Concept រថយន្ត ​ដ៏​ស្រស់​ស្អាត​នេះដែល​បាន​ដាក់បង្ហាញ​កាល​ពី​ថ្ងៃ​ចន្ទ​ត្រូវ​បាន​ផលិត​ឡើង​ដោយ​ផ្តោត​លើ​ការការពារ​បរិស្ថានជាគោល។

ផ្នែកខាងក្នុងនៃ VISION EQXX គឺគ្មានផលិតផលដែលប្រើប្រាស់ស្បែកសត្វនោះឡើយ កៅអីរបស់វាបានធ្វើពីផ្សិត និងសរសៃប្រទាល ជាវត្ថុធាតុដើមតែប៉ុណ្ណោះ។ កំរាលព្រំបានប្រើប្រាស់ដោយឫស្សី ហើយផ្លាស្ទិចខាងក្នុងត្រូវបានផលិតចេញពីសំរាម មកពីកន្លែងចាក់សំរាម។ យោងតាមក្រុមហ៊ុន Mercedes ការប្រើប្រាស់សម្ភារៈទាំងនេះនឺងកាត់បន្ថយសារធាតុកាបូនរបស់ស្បែកសឹងតែពាក់កណ្ដាលឯណោះ។

វិស្វករ​ជំនាញបាន​ធ្វើ​ឱ្យ​ថ្ម​របស់​រថយន្ត​មាន​ទំហំ​តូច​ និង​ស្រាល​ជាង​មុន​ដោយ​មិន​មាន​ការ​ប៉ះពាល់ដល់​ថាមពល​ឡើយ។ ឥឡូវនេះវាមានទំហំតូចជាង ៥០% និងស្រាលជាង ៣០% ជាងថ្មផ្សេងទៀតដែលមានសមត្ថភាពដូចគ្នាទៅទៀត។

 

រថយន្តនេះក៏មានបន្ទះស្រូបពន្លឺព្រះអាទិត្យ ឬ Solar នៅលើដំបូលដែលអាចបន្ថែមចម្ងាយរហូតដល់ ១៥ ម៉ាយក្នុងលក្ខខណ្ឌសមស្របផងដែរ។

ដើម្បីធ្វើឱ្យរថយន្តកាន់តែមានប្រសិទ្ធភាព ពួកគេបានរចនាផ្នែកខាងមុខ និងផ្នែកកង់ខាងក្រោយតូចជាងមុន ដើម្បីទប់ទល់នឹងខ្យល់។ នេះ​ជា​កត្តាសំខាន់ ពី​ព្រោះ​ថា​ថាមពល​ភាគច្រើន​ក្នុង​រថយន្ត​អគ្គិសនី​ត្រូវ​បាន​បញ្ចេញ និងប្រើប្រាស់ ដើម្បី​បញ្ចៀស​ខ្យល់។

ក្រុមហ៊ុន Mercedes Ford និង General Motors កំពុងផ្លាស់ប្តូរទិសដៅ ដើម្បីផ្ដោតទៅរករថយន្តអគ្គិសនី។ នៅឆ្នាំ ២០២៥ គ្រប់ម៉ូដែលរបស់ Mercedes នឹងមានជម្រើសជារថយន្តអគ្គិសនី ហើយពួកគេគ្រោងនឹងប្រើប្រាស់រថយន្តអគ្គិសនីទាំងអស់ក្នុងទសវត្សរ៍ក្រោយ។